Pirion

I bøkene Frosken og fuglesongen og Frosken og den vide verda fylgjer me den morosame og undrande frosken og vennene hans. Max Velthuijs har til saman gitt ut 10 bøker om denne frosken der han med humor og innsikt skildrar små og store opplevingar i livet, både for froskar og menneske.

Kva er det eigentleg å vere forelska? Er det å falle pladask ned på nokon? Eller er det når ein er sprutraud i fjeset? Er det berre noko prinsar og prinsesser er? Og kan ein ikkje brenne seg på forelskinga? Er ikkje det ein brann?

Det er mange spørsmål som dukkar opp når ein prøver å finne ut av kva forelsking eigentleg er. Det er det også hjå Simone, Olav og dei andre barna i barnehagen som me møter i boka Forelsking av forfattar og illustratør Rébecca Dautremer.

Endelig god natt er første boka i ein serie på fire peikebøker frå den svenske illustratøren Camilla Lundsten. Her møter me Veslefanten, Kanina og Makkus som skal legge seg om kvelden. Men først må dei pusse tenner, gå på do, vaske seg, ta på nattklede og ete kveldsmat. Det er mykje som må ordnast før dei endeleg kan leggje seg. Dei andre bøkene i serien er Endelig regn, Endelig mat og Endelig fest.

Dette er ei diktbok dei fleste kan ha glede av. Forfattar Kaldestad og illustratør Kramer har begge ei sterk interesse for fuglar og dyreliv, noko dei serverer borna på gullfat i denne diktsamlinga.

Her er eit kjent eventyr i ein ny form. Dei fleste kjenner nok til Dei tre bukkane Bruse som skal på setra for å bli feite. Men i denne historia går ikkje alt som det plar, bukkane hamnar nemleg i badeland i staden for på setra.

Bjørn Rørvik har eit levande og godt språk i ein svært munnleg drakt. Han skriv nesten på dialekt når han skildrar dialogen mellom bukkane. Og ikkje minst har bukkane fått eit nytt og meir moderne språk.

Forfattaren klarer å la bukkane vere bukkar, også i språket. Det er fornøyeleg å høyre brekinga som nesten kjem av seg sjølv når ein les teksten høgt. Når til dømes den mellomstore bukken lurer på om dei heller kan gå å bade: – Det er så kjedeleg oppe på setra. Bare gå der og bre – e – e – ke hele sommeren.

Det er også brukt visuelle grep i teksten for å gjere lesinga meir variert. Ord og bokstavar er utheva eller skrive med tjukk skrift. Likevel er det litt vanskeleg å forstå alle desse grepa. Det er ikkje alle uthevingane som er like logiske. Men dei får uansett teksten til å leve.

Det er Gry Moursund som står for dei barnslege teikningane. Ho teiknar så truverdig at ein faktisk skulle tru det var borna sin eigen strek som var utgangspunktet. Mange og sterke fargar saman med detaljerte teikningar gir ei biletbok det er verdt å bruke lang tid på.

Og her er ikkje minst mykje humor. Dei aller fleste vil trekkje på smilebandet når det store trollet til slutt må opp i den store vannsklia og forsvinn ut av vindauget. Og dei tre bukkane Bruse står sjølvsagt att som heltar.

Dette er ei historie barna kjenner. Men med nokre enkle grep og klare kontrastar har Rørvik klart å lage noko nytt og spanande ut av eventyret. Og det utan at den opphavlege handlinga forsvinn.

Av Bjørn F. Rørvik
Illustrert av Gry Moursund
Cappelen Damm

Rampete Robin feirar Halloween på sin eigen måte; han driv både foreldre og barnevakter til vanvit og plyndrar Gretne Grete sin hemmelege klubb.